تاند: ( سې شنبه، د حوت ۲ ) د افغانستان بانک لپاره د طالبانو د رژیم چارواکو ویلي، چې نن د ۴۰ میلیونه نقدو ډالرو د مرستې بشري کڅوړه کابل ته رسیدلې ده.
سرچینه زیاتوي، چې دا مرسته د مرستندویه ادارو له لوري یوه سوداګریز بانک ته استول شوې ده.
د مرستو دغه کڅوړې، چې ځينې شنونکي یې د طالبانو رژیم ته د نړیوالو او په ځانګړي ډول د امریکا متحده ایالاتو غیر مستقیم رشوت او د رژیم د مخته وړلو نقدي سرچینې ګڼي، مخکې په اونۍ کې تر دوه او درېیو کڅوړې هم رسول کیدې.
طالبان، دا ادعاوې ردوي او وایي، چې یادې مرستې نړیوال د خپلو اړوندو بشري ادارو د چارو د تامین لپاره استوي.
د یادو مرستو د کمیدو اصلي دلیل د طالبانو د رژیم ځینې تر ټولو سخت دریځې پریکړې دي، چې له مخې یې د نجونو زده کړې، د ښځو کار او د نورو خلکو ځینې اساسي حقونه تروړل شوي.
طالب چارواکي لږ تر لږه د افغانیو د مالي ثبات ساتلو او خلکو ته د بشري مرستو په رسولو کې د دغو مرستو اهمیت تاییدوي، خو له دې سره بیا هم د دغو مرستو د کمیدو پروا نه لري.
نړیوالو ټینګار کړی، چې که طالبان اصلاح شي، افراطي پریکړې شاته وغورځوي او د یوه بین الافغاني تفاهم له لارې یوه د منلو وړ حکومت جوړولو ته غاړه کیږدي، هم به یې رژیم په رسمیت وپېژني او هم به افغانستان سره خپلې مرستې زیاتې کړي.