د کندهار لپاره د طالبانو ولایتي اداره وایي، چې لسګونو نوو مقرر شویو طالبانو ته په بېلابېلو برخو کې دوه میاشتینۍ زده کړې ورکړل شوي دي.
د کندهار لپاره د طالبانو د اطلاعاتو او فرهنګ ریاست ویلي:(( د تخنیکي او مسلکي زدهکړو آمریت له لوري د بېلابیلو ملکي او نظامي ادارو نوو مقرر شوو مجاهدینو ته د ادارې، مدیریت، کمپیوټر او انګلیسي برخو کې دوې میاشتسنۍ زدهکړې ورکړل شوې.))
طالبانو د دغو کسانو د شمېر، اړوندو ادارو او مخکینیو زده کړو په اړه څه نه دي ویلي.
د دوی له بیا واکمنیدو سره د افغانستان بېلابېلې ادارې له مخکینیو کارکوونکو څخه تصفیه شوي او پرځای یې د طالبانو ملایان او جنګیالي پر مسلکي او نورو بستونو ټاکل شوي دي.
دا په داسې حال کې ده، چې د طالبانو د رژیم ویاند ذبیح الله مجاهد لا هم د دوی تر کنټرول لاندې ادارو کې د شاوخوا پينځه سوه زرو پخوانیو مامورینو او مسلکي کادرونو د کار کولو ادعا کوي.
د طالبانو منتقدین د دوی دوه میاشتینیو روزنیزو دورو ته هم، هغه هم په مختلفو برخو کې حیران دي او وایي طالبان په ادارو کې د داسې کسانو له ګومارلو سره چې نه په اداره، نه مدیریت، نه کمپیوټر او نه انګلیسي ژبه پوهیږي، د افغانستان اداري نظام د تباهۍ پر لور بیایي.