تاند: ( دوشنبه، د حوت لومړۍ ) د طالبانو استخباراتو ادارې د ټولنیزو رسنیو د دوو فعالانو( عمران احمدزي او سعدالله دیدن چې په حاجي کاکا مشهور دی) جبري اعترافات خپاره کړي.

په خپرو شویو ویډیویي اعترفاتو کې دغه فعالان وایي چې د طالبانو د رژیم خلاف یې تبلیغات کول، مستعار اکونټونه یې لرل او د ټولنیزو رسنیو له لارې یې فحشا او اخلاقي فساد کاوه.

د طالبانو له لوري د دغو فعالانو د اعترافاتو خپریدو ته د ټولنیزو رسنیو نورو ډېرو فعالانو، چې عمدتاً بهر مېشتي دي او د بیان ازادي لري، توند غبرګونونه ښودلي دي.

دوی ویلي، چې طالبانو باید د دغو اعترافاتو پر ځای د یادو کسانو په اړه د ادعا شویو مواردو مستند اسناد خپاره کړي وای.

په عین حال کې، په فیسبوک کې د ( یاقوت شاه) په نوم له یوه مستعار اکونټ څخه چې طالبانو بندي کړو فعالانو پورې منسوب کړي، پوسټونه شوي او ویل شوي، چې دغه اکونټ د نیول شویو کسانو اړوند نه دی.

په ورته وخت کې له ننګرهار څخه راپورونه وایي، چې طالبانو د پوهنتون یو استاد اسماعیل رحماني هم په ټولنیزو رسنیو کې د طنزیه او انتقادي مطالبو د خپرولو له امله بندي کړی دی.

د طالبانو چارواکو په دې اړه رسماً څه نه دي ویلي.

په افغانستان کې یو شمېر مېشت خلک، چې د طالبانو له وېرې نه غواړي نومونه یې خپاره شي، تاند ته ویلي، چې په ټولنیزو رسنیو کې د طالبانو د منتقدینو د مطالبو د خوښولو له امله هم نیول شوي او شکنجه شوي دي.

دا په داسې حال کې ده، چې طالبان په افغانستان کې د بیان ازادۍ ادعا کوي او په دې اړه د خپل متشدد چلند خبرونه ردوي.