تاند: ( دوشنبه، د حوت لومړۍ ) له لغمان څخه د تاند سرچینې وایي، چې تېره شپه د تورخم دروازه کې پاکستان سره د طالبانو د نښتې پر مهال د دغه ولایت یو اړوند طالب جنګیالی وژل شوی.
سرچینه زیاتوي، چې وژل شوی طالب جنګیالی عبدالصمد نومیږي او د الیشنګ ولسوالۍ اوسیدونکی دی.
د وژل شوي کس یو ورور د یادې ولسوالۍ لپاره د طالبانو د استخباراتو مرستیال دی.
طالبانو رسماً په تورخم جګړه کې د خپلو جنګیالیو یا پاکستاني لوري د مرګ ژوبلې په اړه څه نه دي ویلي.
تورخم دروازه پرون په نا معلوم دلیل طالبانو د هر ډول تګ راتګ پر مخ وتړله او له هغې وروسته تېره شپه پاکستان او طالبانو په دغه سیمه کې وسله واله نښته کړې ده.