تاند:( دوشنبه، د کب لومړۍ) د پاکستان پولیسو ادعا کړې، چې د بلوچستان په مرکز کوټه ښارکې یې یوه بلوڅه ښځه د ځانمرګي برید د پلانولو په تور نیولې ده، خو د ښځې کورنۍ او بلوڅ فعالانو دا تور رد کړی او ویلي، چې پاکستان په داسې جبري نیونو بلوڅان تر فشار لاندې راولي.
د پاکستان د ترهګرۍ ضد پولیسو په یوه اعلامیه کې ویل شوي، چې د ماهل په نوم دا بلوڅه یې د کوئټې په سيټلايټ ټاون سیمه کې نيولې او له هغې څخه يې د چاودېدونکو توکو جاکټ تر لاسه کړی دی.
د بلوڅ فعالانو یوه مدافع نصرالله بلوچ ویلي: ” هغه يې له خپله کوره نيولې وه او له ځانه سره يې وړې ده. دا تورونه چې هغه ځانمرګې بريدګره ده بې ځايه دي. “
د نصرالله بلوچ په خبره نيول شوې ماهل بلوڅ مېړه درې يا څلور کاله وړاندې د پاکستاني ځواکونو له لوري په يوه مقابله کې وژل شوی دی او دوی دوې لوڼې لري.
د لادرکه بلوڅانو د ټولنې د راپور له مخې، یوازې د روان میلادي کال له پيله تراوسه په پاکستان کې ۳۷ نور بلوڅان نادرکه شوي، چې له ډلې یې ۳ تنه بیرته پيدا شوي دي.
دغه ټولنه وايي تېر کال یې حکومت ته د 770 لادرکه کسانو نوم لړ يا ليسټ ورکړی وو چې 300 تنه پکې خپلو کورونو ته ستانه شوي دي.