تاند: (چار شنبه، د دلوې 26) د افغانستان لپاره د امريکا متحده ايالاتو پخوانی ځانګړی استازی زلمی خلیلزاد وايي داعش د طالبانو او نړیوالې ټولنې ګډ دښمن دی.
نوموړي په تازه څرګندونو کې ويلي، د دغې ترهګرې ډلې پر وړاندې همکاري د طالبانو او نړيوالې ټولنې د راتلونکو اړیکو مهمه برخه کېدای شي.
هغه يادونه وکړه، چې طالبانو د دوحې تړون لاسليک کړی او د دغه تړون پر مواردو عمل د ټولو ستونزو د حل زمینه برابرولی شي.
هغه يو ځل بيا له طالبانو وغوښتل ، چې ياد شوی تړون عملي کړي.
که څه هم طالبانو په ځلونو په افغانستان کې د داعش موجوديت رد کړی دی خو وخت په وخت په ځینو سیمو په تېره بیا په کابل کې د دغې ډلې پرضد د عملیاتو خبر ورکوي.
څو ورځې مخکې د د ډله ییز امنیت سازمان د ګډو ځواکونو مشر اناتولي سیدوروف وويل، چې په افغانستان کې د داعش د جنګیالیو شمېر ۶۵۰۰ ته رسېدلی.
د هغه په وينا، له دغو ځواکونو څخه ۴۰۰۰ یې د تاجیکستان پولې ته څېرمه مېشت شوي دي.
په عین حال کې د امریکا د بهرنیو چارو وزارت ويلي، که لازمه وویني د داعش پر ضد د افغانستان په خاوره کې عملیات کوي.