تاند:( جمعه، د دلوې څوارلسمه) د پښتون ژغورنې غورځنګ رهبر منظور پښتین د افغان نجونو د زده کړو د مخنيوي په دفاع په ملګرو ملتونو کې د پاکستان د استازي منير اکرم له سپکاوي ډکو څرګندونو ته غبرګون ښودلی.
ښاغلي پښتين ویلي:« د ښځو تعلیم نه کول د پښتنو رواج نه دی؛ بلکې د ډیويډجونز څخه رانیولې تر کرنل امام پورې يوه دسيسه ده، چې پښتانه افغانان وروسته پاتې وساتي.»
ښاغلی پښتين زياتوي:« په UN کې د پاکستاني استازي د افغان نجونو بند تعلیم ته بې بنیاده جوازونو واضحه کړه چې د نجونو تعلیم د بندیز پر شا څوک دي.»
په ورته وخت کې د افغانستان يوه مشهور سياسي او علمي شخصيت ډاکټر علي احمد جلالي هم د پاکستاني استازي دغو څرګندونو ته غبرګون ښودلی.
نوموړي ويلي:« د ملګرو ملتونو په سازمان کې د پاکستان سفیر په افغانستان کی د طالبانو افراطیت د پښتنو له فرهنګ سره تړي. د طالب او نورو ترهګرو افراطیت د دوی په ايډيالوژۍ کی دی نه په قومیت کې،
د طالبانو پالیسۍ او کړنی نه دپښتنو، نه د افغانستان او نه داسلامي تمدن نمایندګي کوي.»
په ورته وخت کې د پاکستان د بهرنيو چارو وزارت ويلي، چې د استازي خبرې يې ناسم تعبير شوي دي.
مخکې د پاکستان ګوښه شوي صدراعظم عمران خان هم د پښتنو د کولتور په اړه له سپکاوي ډکې ورته څرګندونې کړې وې.