تاند:( دوشنبه، د دلوې لسمه) د طالبانو د حاکمې ډلې عمومي ویاند ذبیح الله مجاهد په کابل او ولایتونو کې د داعش ډلې د ځالو د له منځه وړلو خبر ورکړی.
نوموړي په تازه څرګندونو کې د دغې ډلې د نورو ځالو د ختمولو لپاره هم د هڅو خبر ورکړی.
مجاهد زياتوي، چې داعش ډله په افغانستان کې ريښې نه لري، له دې کبله ژر ختمولای يې شي.
تازه، د افغانستان لپاره د ایران د ولسمشر ځانګړي استازي او په کابل کې د دغه هېواد سفير حسن کاظمي قمي په افغانستان کې د داعش ډلې د خطر د پراخيدو ادعا کړې او امریکا یې له دغه خطر څخه په ملاتړ تورنه کړې ده.
نوموړي په یوه ټلويزيوني مرکه کې د افغانستان لویدیز او شمال ته د داعش ډلې د پراختيا يادونه وکړه او ويې ويل، چې هلته ایران او د منځنۍ اسيا هېوادونو ته ګواښ جوړوي.
طالب چارواکو مخکې هم د داعش ډلې د ځپلو ادعا کړې، خو څه موده وروسته يې دغې ډلې په تازه بريدونو بیرته خپل حضور ښودلی دی.