تاند:( شنبه، د جدي ۱۷) د طالبانو تر کنټرول لاندې د افغانستان بانک چارواکو کابل سره د نړيوالو بشري مرستو د پرې کیدو خبر ورکړ.
د دغه بانک لپاره د طالبانو ویاند حسیب نوري وويل، چې دا مرستې د تېرې لیندۍ میاشتې له ۲۳ مې نېټې څخه پرې شوي دي.
د هغه په وينا، يادې مرستې د ښځو او نجونو پر وړاندې د وروستیو بندیزونو په غبرګون کې د يوناما ادارې له لوري ځنډول شوي.
د افغانستان بانک د حاکمو چارواکو د معلوماتو له مخې، د ۲۰۲۲ میلادي کال د دسمبر له څوارلسمې تر اوسه افغانستان ته ۱۲۰ ميليونه ډالره نقدي مرسته را رسیدلې ده.
په افغانستان کې د ملګرو ملتونو د ځانګړي استازي مرستيال مارکس پوتزل نن خبرداری ورکړ، چې افغانستان د ناورين یو نوي پړاو ته په ننوتو دی.
نوموړي د طالبانو د لوړو زده کړو وزير سره د لیدنې پر مهال وویل، چې د طالبانو لخوا د ښځو پر زده کړو او په مرستندویه ادارو کې د هغوی پر کار بندیز به ټول افغانان زیانمن کړي.
د ښځو او نجونو د زده کړو او کار پر ضد د طالبانو بندیزونه په پراخه کچه د نړیوالو مخالفت سره مخ شوی او خبرداری ورکړل شوی، چې د دغو بندیزونو له نه لغوه کیدو سره به افغانستان سره کيدونکې بشري مرستې ودرول شي.
د طالبانو ځينو چارواکو او له هغې ډلې د دوی د لوړو زده کړو سخت دریځه وزیر ملا ندا محمد ندیم د ښځو زده کړې او کار د دوی « بې عزتي» او « د کفارو غوښتنه» ګڼلې او ورسره د مخالفت په دوام ېې ټینګار کړی.