تاند (جمعه، د جدي ۱۶ مه) په داسې حال کې چې د افغانستان طالبان ښځې له تعلیم او کار کولو منع کړي، سعودي عربستان، چې حکومت یې د مکې او مدنې واګې په لاس کې لري، وايي چې په بیلابیلو هیوادونو کې یې د ښځینه سفیرانو شمېر ۵ ته ورسید.
د سعودي عربستان اصلاح غوښتونکی ولیعهد محمد بن سلمان، چې غواړي تر ۲۰۳۰ پورې سعودي د تېلو له اتکا پرته پر یوه شتمن او پرمختللي هیواد بدل کړي، ښځو او نارینه وو ته یو شان فرصتونه برابروي.
د العربیه د انګلیسي ویبپاڼې د راپور له مخې، سعودي تر دې دمه د نړۍ په ۵ هیوادونو کې ښځینه سفیرانې لري.
شهزادګۍ ریما بنت بندر السعود د سعودي لومړنۍ سفیره وه چې په ۲۰۱۹ م کال د امریکا په متحدو ایالتونو کې د ولیعهد محمد بن سلمان په حکم سفیره وګومارل شوه.
شهزادګۍ ریما تر دې وړاندې د ښځو په چارو کې بیلابېلې دندې لرلې.
د روانې جنورۍ په درېیمه حفیه الجدیه د اروپايي اتحادیې او همداراز د اروپايي اتحادیې د اتومي انرژۍ لپاره د سعودي سفیره وټاکل شوه.
الجدیه د بحرانونو د حل په برخه کې ماستري لري. دې همداراز د امریکا د کولمبیا په پوهنتون کې په نړیوالو اړیکو کې ماستري کړې ده.
انس الشاوان د ۲۰۲۱ په اپریل کې په سویډن کې د سعودي سفیره ګومارل شوې ده. دې په استرالیا کې په نړیوالو اړیکو کې ماستري کړې او د امریکا له هارورډ پوهنتون څخه یې د راڅرګندېدونکې مشرتابه په څانګه کې سرټیفیکیټ اخیستی دی.
دې تر دې وړاندې د سعودي په بهرنیو چارو وزارت کې کار کړی دی.
په تازه ګومارل شویو ښځو کې یوه هم نسرین الشیبل ده چې د جنورۍ په درېیمه په فنلنډ کې سفیره وګومارل شوه.
پنځمه سعودي سفیره امل یحیي المعلیمي ده چې په ناروې کې د سعودي د سفیرې په توګه کار کوي.
ناروې په نړۍ کې هغه هیواد دی چې ښځو او د هغو کار او حقونو ته تر بل هر هیواد زیات اهمیت ورکوي.
المعلمي په سعودي کې په انکلیسي ژبه کې لیسانس کړی او همداراز یې د امریکا په دینویر پوهنتون کې د ژورنالیزم په برخه کې زده کړې کړي دي.