تاند:( دوشنبه، د جدي دولسمه) له پاکستان څخه راپورونه وايي، چې د دغه هېواد په کراچۍ ښار لسګونه بندي افغان مېرمنې د بند مودې له پوره کیدو سره لا هم نه دي خوشې شوي.
پاکستاني چارواکو ويلي وو، چې په دغه ښار کې يې ۱۲۰۰ افغانان د نا قانونه ورتلو په تور بنديان کړي.
په دغو کسانو کې ښځې او ماشومان هم شامل دي، چې خپرو شويو عکسونو ېې د ملګرو ملتونو او افغانانو نیوکې رامنځته کړي دي.
يو شمېر بندي مېرمنو رسنيو ته ويلي، چې د بند مودې له پای ته رسېدو وروسته ېې هم پاکستاني چارواکي نه خوشې کوي.
د کراچۍ پوليس چارواکي وايي، چې ژر به یو شمېر دغه بندي کډوال له بنده خوشې او افغانستان ته ولېږدوي.
د ټولنیزو رسنیو فعالانو د پاکستان په کراچۍ ښار کې د بندي افغان ماشومانو او مېرمنو پر خپرو شويو عکسونو خواشيني ښودلې او طالبانو ته په خطاب کې ېې ویلي، چې د افراطي ګامونو له کبله د افغانانو د ذلیله کیدو مسوول دي.
په پاکستان کې د طالبانو تر کنټرول لاندې د افغانستان سفارت بيا په دې اړه د خپلو هڅو خبر ورکړی او د پاکستان حکومت یې د یادو بنديانو د خوشې کولو د ژمنې په نه عملي کولو تورن کړی.