تاند:( یکشنبه، د جدي يوولسمه) د ملګرو ملتونو سازمان او د افغانستان پخواني ولسمشر حامد کرزي د پاکستان په زندانونو کې د افغان کډوالو د وضعيت په اړه انديښنه ښودلې ده.
د ملګرو ملتونو د کډوالو عالي کميشنرۍ په یوه اعلامیه کې راغلي، چې په دغو زندانونو کې د بندي افغان بنديانو اړوند خپاره شوي عکسونه د اندیښنې وړ دي.
په ملګرو ملتونو کې د افغانستان دایمي نمایندګۍ هم په یوه اعلامیه کې له پاکستاني چارواکو غوښتي، چې بندي کړي افغان کډوال بیرته خوشې کړي.
له دې سره، په اسلام اباد کې د طالبانو تر کنټرول لاندې د افغانستان سفارت ويلي، چې د دوی په هڅو تر ۵۰۰ پورې افغان کډوال د پاکستان له زندانونو خوشې شوي دي.
دا په داسې حال کې ده، چې پاکستاني چارواکو يوازې په کراچۍ ښار کې د ۱۲۰۰ افغان کډوالو د نیولو خبر ورکړی.
د ټولنیزو رسنیو فعالانو د پاکستان په کراچۍ ښار کې د بندي افغان ماشومانو او مېرمنو پر خپرو شويو عکسونو خواشيني ښودلې او طالبانو ته په خطاب کې ېې ویلي، چې د افراطي ګامونو له کبله د افغانانو د ذلیله کیدو مسوول دي.