تاند(یکشنبه، د جدي ۴ مه) د ملګروملتو جګپوړي استازي او په افغانستان کې د فعالو لسګونو غیرحکومتي موسسو استازي نن (یکشنبه) په دې غور کوي چې د طالبانو له لوري په غیرحکومتي موسسو کې د ښځو پر کار له بندیز وروسته باید څه پرېکړه وکړي.
د طالبانو د اقتصاد وزارت پرون په یوه اعلامیه کې وویل، د دې لپاره چې د کورنیو او بهرنیو موسسو د کارونو او لارښوونو د انسجام چارو مسوولیت د دوی دی نو ټولو غیرحکومتي کورنیو او بهرنیو موسسو ته هدایت کېږي چې د خپلو ټولو ښځینه مامورینو کار ودروي.
دا وزارت د خپلې پرېکړې د دلیل په توګه وايي چې په وروستیو کې یې داسي شکایتونه اورېدلي چې ګواکي په غیردولتي موسسو کې اسلامي حجاب او د امارت نور مقررات او قوانین نه رعایت کېدل.
د ملګروملتو د بشري چارو د همږغۍ د دفتر د عامه اړیکو مسوول تاپیوا ګومو فرانس پریس خبري اژانس ته ویلي:«د بشري مرستو د موسسو د افغانستان ټیم یا (HCT) نن ناوخته غونډه کوي چې له ستونزې سره د چلند په اړه خبرې او مشورې وکړي.»
ایچ سي ټي د ملګروملتو له مامورینو او د لسګونو افغان او نړیوالو غیرحکومتي موسسو جوړه ده.
د ځینو غیرحکومتي موسسو کارکوونکو ویلي چې دوی به په دې خبرې وکړي چې ایا د طالبانو له پرېکړې وروسته په افغانستان کې خپل کارونه په بشپړ ډول ودروي.
ملګروملتو د طالبانو پرېکړه غندلې خو ویلي یې دي چې د هغې په اړه به له طالبانو وضاحت وغواړي.
د امریکا د بهرنیو چارو وزیر انتوني بلینکن په افغانستان کې په کورنیو او بهرنیو غیرحکومتي ادارو او موسسو کې د طالبانو له خوا د ښځو پر کار پر بندیز ژوره اندیښنه ښکاره کړه، ویې ویل چې دا اقدام به په افغانستان کې له ملیونونو کسانو سره د ژوند ژغورنې د مرستو بهیرګډوډ وکړي.