خبریال: مینه احمد(جمعه، د جدي ۲ مه) سلګونو افغانانو پرون مازدیګر د جرمني د نارد راین ویستفالن ایالت په هیلدن ښار کې د طالبانو د وروستۍ پریکړې پر ضد لاریون توکړ.
لاریونوالو د طالبانو د مشر د هغه فرمان پر ضد شعارونه ورکړل چې پر اساس یې په افغانستان کې د نجونو د پوهنتون زده کړې تر نامعلومې مودې پورې ځنډول شوې دي.
د لاریونوالو مخکښې ظریفه غفاري په خپلو خبرو کې د طالبانو وروستی اقدام نه یوازې د اسلام پر سپیڅلې لمن تور داغ وباله بلکه دا یې د افغانیت او راتلونکو نسلونو د تباهۍ هغه هڅه وبلله چې په کور د ننه او بهر کې تنظیمیږي.
میرمن غفاري د نړۍ له عامو وګړو هم وغوښتل تر څو د خپلو سیاستوالو د هغو پټو معاملو پر وړاندې غږ پورته کړي چې د دوحې په تړون کې یې افغانې ښځې په یوه افراطي مذهبي ډله وپلورلې.
د افغانستان د مختلفو اقوامو ښځینه او نارینه لاریونوالو هم د طالبانو د وروستي فرمان پر ضد شعارونه ورکړل او له نړیوالې ټولنې یې وغوښتل چې د افغان ښځو تر څنګ ودریږي او د حقونو ناقضین یې نړیوالې محاکمې ته کش کړي او دغه راز یې په کور دننه او بهر په میشتو افغانانو هم غږ وکړ چې په ملي یوالي د تروریستي ډلو د دا ډول شرمناکو او غیر اسلامي اقداماتو په وړاندې ملي پاڅون وکړي.