تاند:( شنبه، د قوس شپږ ويشتمه) د پښتونخوا ملي عوامي ګوند مشر محمود خان اڅکزي د پاکستان له سترې محکمې وغوښتل، چې د پاکستان په پارلمان کې د جنوبي وزيرستان د استازي علي وزير د څو کلن بند په اړه، چې لا هم دوام لري خپل دريځ روښانه کړي.
نوموړي د علي وزير د خوشې کیدو لپاره د بللي لاریون پر مهال دا غوښتنه وکړه او ټینګار یې وکړ، چې د هغه د « ملامتۍ» یا « بې ګناهۍ» خبره باید ستره محکمه معلومه کړي.
د پاکستان د حکومت له مختلفو تر کنټرول لاندې سیمو څخه راپورونه ښيي، چې پرون د جمعې په ورځ د محمود خان اڅکزي په غوښتنه د هغه د ګوند سلګونه غړو د علي وزير د خوشې کیدو لپاره بېلابېل لاریونونه کړي.
علي وزير په پښتنو سيمو کې د پاکستان د پوځ او استخباراتو د مرموزو پښتون ضدو سياستونو سرسخت منتقد و، چې د پاکستان پوځ له څو کلونو راهيسې بندي کړی او د محکمو له لوري يې د خوشې کیدو له څو پریکړو سره بیا هم خوشې کیدو ته نه پرېږدي.
د ښاغلي وزير د خوشې کیدو لپاره په لسګونه ځله پاکستان او نورو سيمو کې سلګونه زره پښتنو لاریونونه کړي، خو غږ يې نه دی اورېدل شوی.
پښتانه ملتپال په دې اړه د بشري حقونو پر نړیوالو مدافع ادرسونو هم د نه پاملرنې له امله نیوکې لري.