تاند (دوشنبه، د قوس ۱۴مه) د افغانستان بانک وايي چې نن (دوشنبه) ۴۰ میلیون ډالره نورې پیسې کابل ته ورسیدې.
په وروستیو کې هره اوونۍ افغانستان ته ۴۰ منیلیون ډالره د بشري مرستې په توګه رارسیږي. تېر کال دا اندازه د اوونۍ شل میلیون ډالره وه.
د افغانستان بانک د خبرپاڼې له مخې، دا پیسې هم د مخکنیو هغو په شان د افغانستان یوه خصوصي بانک ته وسپارل شوې.
د افغانستان بانک په خبرپاڼه کې د دغه خصوصي بانک نوم نه دی یاد شوی.
د افغانستان بانک وايي، تېره اوونۍ هم کابل ته ۴۰ میلیون ډالره رسیدلې وو چې ورسره د افغانستان د بهرنیو اسعارو زیرمه یو نیم میلیارد ډالرو ته ورسیده.
دا پیسې له هغو جلا دي چې له افغانستانه دباندې زېرمه یا کنګل شوي دي.
د افغانستان شاوخوا ۱۰ میلیارد ډالره په امریکايي او اروپايي بانکونو کې سانل کېږي. امریکا د دغو پیسو شاوخوا ۳ میلیارده سویس ته انتقال کړې چې د افغانستان پهنوم په یوه ځانګړي حساب کې وساتل شي.