تاند:(چار شنبه، د قوس نهمه) د کابل – جلال اباد پر لویه لاره د يوې ترافیکي پیښې له امله نن یو تن وژل شوی او ۶ تنه نور ټپيان دي.
د لغمان لپاره د طالبانو د امینې قومندانۍ په یوه خبرپاڼه کې راغلي چې دغه پېښه نن سهار شاوخوا پنځه بجې د دغه ولايت اړوند د قرغیو ولسوالۍ په کاکڅ سیمه کې شوې ده.
سرچينه زياتوي: ((یو نارنجي ټوډي موټر له عمومي سړک څخه د تیریدو په حال کې و، چې له یوې ونې سره وجنګېد، موټر چلوونکي هجرت الله نومی د حاجی ریس زوی پکې شهید او همدا راز د سپرلۍ شپږ تنه ټپیان شول، دوی د یوې کورنۍ غړي او د لوګر ولایت اوسېدونکي دي، ټپیان د شاهراه قوماندانۍ امنیتي منسوبینو له خوا روغتون ته انتقال شوي د ټپيانو روغتيايي حالت د ډاډ وړ ښودل شوی))
د يادونې وړ ده، چې پر دغې لویې لارې ډېر ځله د ورته ترافیکي پېښو خبرونه ورکول کېږي.