تاند:( دوشنبه، د عقرب دېرشمه) د برېښنا شرکت لپاره د طالبانو چارواکو په يوه مطبوعاتي ناسته کې نن، د خپلو تېرو درېیو میاشتو د فعالیتونو راپور وړاندې کړ.
د دغه شرکت ویاند حکمت الله میوندي وویل: په تېرو دوو میاشتو کې تصدیو او دولتي ادارو ۵۵۴ میلیونه ۵۹۵ زره ۴۹۸ افغانۍ پورونه د افغانستان برېښنا شرکت ته سپارلي او د ریاست الوزرا عالي مقام حکم له صادرېدو تر اوسه، ټولټال ۱ میلیارد او …۱۲۹ میلیونه او ۶۹۳ زره او ۹۲۵ افغانۍ د مالیې وزارت له لارې د دغه شرکت حساب ته انتقال شوي دي.
د دغه شرکت مسئولین زیاتوي: له سیاسیونو او زورواکو څخه د پورونو د ترلاسه کولو په لړ کې له ۵۴۵ پوړوړو څخه تر اوسه ۲۰۱ تنو یې ۴۵ میلیونه او ۵۲۵ زره او ۴۰۴ افغانۍ ورکړي دي.
د بریښنا شرکت چارواکو د پوروړو د هويت په اړه څه نه دي ويلي.
مخکې ويل شوي وو، چې د دغه شرکت په پوروړو کې اکثره یې پخواني چارواکي، سياستوال او زورواکي دي.
طالبانو خبرداری ورکړی و، چې د بريښنا شرکت بهر ته تللي پوروړي که پورونه لنډ نه کړي، جایدادونه او کورونه به ېې لیلام کړي.