تاند:( جمعه، د عقرب اووه ويشتمه) د افغان کارت شرکت په هڅو له افغانستان څخه مسکوته د کندهار د انارو صادرات له دیرش کلن ځنډ وروسته بیا پیل شول.
د طالبانو د حاکمې ادارې وياند ذبيح الله مجاهد وايي، له دې ګام سره به د هېواد په صادراتو کې زیاتوالی راشي او د وچو میوو په څیر به لندو میوو ته هم له هېواده بهر مارکیټ پیدا شي.
د طالبانو يوه بل ویاند انعام الله سمنګاني د صادر شویو انارو اندازه ۲۰ ټنه ښودلې ده.
ياد شوي انار په داسې حال کې روسیې ته صادر شوي، چې پاکستان له څو ورځو راهيسې د سپین بولدک- چمن د تګ راتګ لاره طالبانو سره د نښتې له امله تړلې ده.
افغان سوداګرو له دې امله صادراتو او سوداګرۍ ته ېې د زيان اوښتو خبر ورکړی او د طالبانو له ادارې غوښتي، چې پاکستان سره په دې اړه وغږیږي.