تاند:(چار شنبه ،د عقرب يوولسمه) د پښتون ژغورنې غورځنګ رهبر منظور پښتین په فرانسه کې د روانې نومبر مياشتې په شلمه د لاریون اعلان وکړ.
نوموړي په خپله ټویټر پاڼه لیکلي:« دغه لاريون به په Place de la République کې ماسپښین 02:00pm څخه تر 05:30pm پورې تر سره شي.»
ښاغلي پښتين د طالبانو د حاکمې ادارې لخوا پر افغان نجونو د تعلیمي بندیز ختمول، په خیبر پښتونخوا او جنوبي پښتونخوا کې د ظلم جبر او ترهګریزې پالیسۍ مخالفت، د پاکستان له زندانونو څخه د علي وزير او حنیف خلاصون او ورته نور مسايل د دغه لاریون اصلي موخې ګڼلي دي.
پښتون ژغورنې غورځنګ په وروستيو کې د پاکستان د مختلفو برخو تر څنګ په نړيواله کچه خپلې مبارزې پراخې کړي، چې د مينه والو تاوده هرکلي سره يې مخامخ شوي دي.