تاند:(پنجشنبه ،د عقرب پینځمه) په بادغیس کې د طالبانو ځايي چارواکو د ګازو د یوې لویې زېرمې د کشف خبر ورکړی.
د بادغيس د کانونو لپاره د طالبانو رييس قاري شمس الدين نظامي وايي، چې د کانونو او پټروليم وزارت انجنيران د لومړنيو څېړنو په موخه دغه ولايت ته ورغلي او د بالامرغاب ولسوالۍ په تنګي بزبای سيمه کې يې د ګازو یوه ستره زېرمه کشف کړې ده.
هغه په دې اړه نور جزییات نه دي ورکړي.
د طالبانو له واکمنيدو سره په ډېرو هغو سيمو کې چې پخوا نا امني وه، اوس د کانونو د سپړلو او نویو کانونو د کشف خبرونه ورکړل شوي.
طالبان باور لري، چې د کانونو په ګډون نورو طبيعي سرچينو څخه به د خپلې واکمنۍ مالي اړتياوې پوره کړای شي.
د دوی منتقدین بيا وايي، چې طالبانو افغانستان او اړوندې ادارې یې له مسلکي کادرونو تصفيه کړي او په دې صورت کې به د غیر مسلکي مسوولینو او ملایانو په لاس د کانونو کيندل او خرڅلاو د هېواد په تاوان تمام شي.
دیر مثمر او د شکرانی ورتیا لری