تاند:(چار شنبه ،د عقرب څلورمه) ایراني چارواکو ویلي، چې د روان میلادي کال په لومړيو شپږو مياشتوکې یوازې د هرات د اسلام قلعه بندر له لارې دغه هېواد ته له افغانستان څخه ورته د څه باندې ۱۸۵ میلیونه ډالرو صادرات شوي دي.
په یاد شوي بندر کې د ایران یوه اقتصادي مقام حسن رحیمي زاده ويلي، چې دغه صادرات هم د ایران لپاره شوي او هم ېې یوه برخه د ایران له لارې ځينو اروپايي او اسیايي هېوادونو ته لېږدول شوې دي.
ایراني مقام د ایران له لوري د اسلام قلعه بندر له لارې افغانستان او د افغانستان له لارې یو شمېر نورو هېوادونو ته د شويو صادراتو کچه څه باندې ۸۰۰ ميليونه ډالره ښودلې ده.
دا په داسې حال کې ده، چې د طالبانو له واکمنيدو سره د افغانستان اقتصاد ته په ټوله او صادراتو ته په خاصه توګه د زيات تاوان اوښتو خبر ورکړل شوی.
د نړیوالو له لوري د طالبانو د حاکمې ادارې نه په رسميت پېژندل، د امریکا له لوري افغانستان د شاوخوا ۱۰ ميليارده ډالره بانکي زېرمې کنګل کیدل او له افغانستان څخه د سلګونه میلیونه ډالرو پانګې تېښته د دغه وضعیت عمده لاملونه ګڼل کېږي.