تاند:(شنبه ،د ميزان ۳۰مه) په سیمه کې د امریکا نیږدې متحد پاکستان، چې څه موده د ترهګرۍ د ملاتړ له امله د مستندو تورونو په اساس امریکا او نړیوالې ټولنې څنډې ته کړی و، بیرته یې له امریکا سره اړیکې خوږې شوي او نوو مالي امتيازاتو څخه برخمن شوی.
تازه د مالي ګامونو نړیوالې کمیټې FATF چې په ۲۰۱۸ کې ېې پاکستان د ترهګرو ډلو د ملاتړو هېوادونو په خړنوملړ کې شامل کړی و، بیرته له دغه لېست څخه د پاکستان نوم ايسته کړی.
ویل کیږي، چې دا پریکړه امریکا متحده ایالاتو ته د پاکستان د پوځ د مشر جنرال باجوه د سفر په پايله کې شوې.
امریکايي چارواکو په وروستيو کې پاکستان سره د اړيکو ښه کیدو خبر ورکړی.
د افغانستان لپاره د امريکا ځانګړي استازي ټام ويسټ په خپله وروستۍ مرکه کې پاکستان د ترهګرۍ پر وړاندې مبارزه کې د خپل هېواد ستراتيژيک ملګری ياد کړی.
څارونکي باور لري، چې د ترهګرو ډلو د ملاتړو هېوادونو په خړ لیست کې د پاکستان د شاملولو په برخه کې د افغانستان پرزول شوي نظام مهم رول درلود، ځکه په افغانستان کې ېې د ترهګرو ډلو د فعاليتونو د تمويل په برخه کې پاکستان افشا کړی او په نړیواله کچه فشار لاندې راوستی و.
د دوی په باور، د افغانستان له بې نظامه کيدو څخه وروسته، چې پاکستان پکې په اساسي نقش لرلو تورنیږي، پاکستان وکړای شول کابل ته د القاعدې شبکې د مشر ایمن الظواهري له ليږد او هلته ېې پر امريکا له وژلو سره افغانستان د ترهګرو د پټنځای په توګه نړيوالو ته معرفي کړي.
یو شمېر افغانان د طالبانو حاکم رژیم په دې برخه کې ملامت بولي، چې د توندروۍ تر څنګ ېې پاکستان سره مرموزې اړیکې د افغانستان د نړيوالې انزوا او پاکستان ته پرې په نړيواله کچه د معاملو زمینه برابره شوې ده.
د طالبانو رژيم بيا په دې اړه نیوکې بې بنسټه بولي او د خپلو کړنو دفاع کوي.