تاند:(شنبه ،د ميزان ۳۰مه) د طالبانو د بهرنيو چارو وزارت سياسي مرستيال عباس ستانکزي نن افغانستان لپاره د ملګرو ملتونو ځانګړي راپور جوړونکي ريچارډ بينټ او ورسره مل پلاوي سره لیدلي.
د طالبانو د بهرنيو چارو وزارت د خبرپاڼې له مخې، په دې لیدنه کې د ملګرو ملتونو ځانګړي راپور جوړونکي دوی ته د سفر د اسانتياوو برابرولو او هم«حقايقو ته د ازادانه لاس رسي» مننه وکړه.
ستانکزي ريچارد بينټ ته د ښه راغلاست ترڅنګ وويل: زمونږ د ګاونډيانو څخه نيولې د اروپا په ګډون په ټوله نړۍ کې بشري ستونزې شته او افغانستان بيا تازه له نيمې پېړۍ جنګ نه راوتلی.
نوموړي وويل:« د ښځو د ځان او غیر قانوني وژنو، اختطاف او په زندانونو کې د شکنجو کچه اوس صفر ته رسېدلې.»
ستانکزي همداراز له ملګرو ملتونو څخه د اقتصادي ستونزو، بانکي محدوديتونو، معتادينو د درملنې او ورته نورو ستونزو په حل کې د مرستو غوښتنه وکړه.
د طالبانو د خبرپاڼې په اساس، په دې لیدنه کې بينټ هم ژمنه وکړه چې له بهرنيو مرسته کوونکو سره به خبرې وکړي تر څو په افغانستان کې د بېوزلۍ له منځه وړلو لپاره هر راز مرستې ترسره شي.
د طالبانو د چارواکو دا څرګندونې په داسې حال کې دي، چې د ملګرو ملتونو بېلابېلې ادارې او د بشري حقونو اړوند ګڼ نړيوال سازمانونه په پرله پسې ډول د طالبانو د حاکمیت له کبله د دوی د منتقدینو او پخوانيو حکومتي منسوبينو د وژلو او شکنجو او د ښځو د حقونو د پراخ نقض راپورونه ورکوي.
طالبان په دې اړه ټول تورونه ردوي، چې له دې کبله یې وياندويان او چارواکي په دروغ ویلو تورنیږي.