تاند(شنبه، د میزان۳۰) د افغانستان لپاره د امریکا ځانګړی استازی توماس ویسټ وايي، په یوه میاشت کې به د افغانستان د کنګل شویو شتمنیو په اړه په سویس کې د افغانستان د پیسو د صندوق د غړیو ترمنځ لومړنۍ غونډه دایره شي.
ده زیاته کړه، په دې ناسته کې به دوه استازي د امریکا او سویس او دوه تنه هم د افغانستان ګډون ولري.
ویست وویل چې دی او د امریکا په حکومت کې د ده همکاران له طالبانو سره تماس لري او د پاکستان په شمول کوم درېمګړي هیواد ته اړتیا نه ویني.
ده زیاته کړه:«موږ د اعتماد رامنځته کولو لور ته روان یوو خو بې له شکه په افغانستان کې امریکا سترې ملي ګټې لري او هغه دا دي چې افغانستان بیا د تروریستانو په خوندي ځالې بدل نه شي.»
ویسټ ټینګار وکړ، د جون په وروستیو کې په کابل کې د القاعده شبکې د مشر ایمن الظواهري له وژل کېدو وروسته امریکايي چارواکو دوې اوونۍ پخوا په دوحه کې له طالب چارواکو سره مخامخ خبرې وکړې.
ده د امریکا او طالبانو د استخباراتي مشرانو د کتنې په اړه د یوې پوښتنې په ځواب کې وویل چې په دې کتنه کې د نورو امریکايي چارواکو ګډون نه تاییدوي او نه ردوي.
مخکې په راپورونو کې ویل شوي وو چې د امریکا د سي آی اې مرستیال ريیس او د طالبانو د استخباراتو رييس د دوحې په غونډه کې ګډون درلود او دوی په ځینو مهمو موضوعاتو خبرې او موافقې کړي دي.
خو ښاغلي ویسټ وویل چې د دوحې په کتنه کې د افغان نجونو د تعلیم، د ښځو د حقونو او کار، له تروریزم سره د مبارزې او پراخ بنسټه حکومت په اړه خبرې شوي دي.
ویسټ په دې اړه چې ایا د داعش په اړه هم دواړو خواوو خبرې کړي؛ وویل، «دا ترورزیستي ډله د امریکا اوافغانانو ګډه دښمنه ده.»
طالبانو تېره شپه د کابل په بني حصار کې د داعش یو پټنځای له منځه یووړ او د دې دلې ۶ غړي یې پکې ووژل.