تاند:(شنبه ،د ميزان ۲۳مه)‏‌ د طالبانو د لوړو زده کړو سرپرست وزير مولانا عبدالباقي حقاني په ننګرهار کې له افتخاري دوکتورا اخيستو وروسته د حدیثو اجازه هم تر لاسه کړې ده.

د ننګرهار لپاره د طالبانو د والي دفتر په یوه اعلامیه کې ویلي،چې نوموړي دغه اجازه د پخواني او جید عالم مولوي ولي الحق صديقي ديوبندي سره د لیدنې پر مهال له هغه څخه اخيستې ده.

د طالبانو په اعلامیه کې د مولوي ولي الحق صدیقي په اړه لیکل شوي چې نوموړی اوسمهال شاوخوا (١٠٦) یوسل او شپږ کاله عمر لري، په ١٣٢٨ هـ ش کال د هند دارالعلوم دیوبند مهتمم شیخ الاسلام حسین احمد مدني رحمه الله شاګرد و.

سرچينه زياتوي، چې نوموړي د خپل دیوبندي استاد په لاس ورکړل شوي سندونه د طالبانو د لوړو زده کړو سرپرست وزیر ته ښودلي او عبدالباقي حقاني ته ېې د حديثو اجازه هم ورکړې ده.

د طالبانو د لوړو زده کړو وزير ته تېره اونۍ د ننګرهار پوهنتون له لوري افتخاري دوکتورا هم ورکړل شوه، چې د يو شمېر خلکو له توندو غبرګونونو سره مخ شوه.

ویل شوي،چې عبدالباقي حقاني د پاکستان تر کنټرول لاندې د اکوړه خټک له حقانیه مدرسې څخه فارغ شوی او عصري زده کړې نه لري.