تاند(چهارشنبه، د میزان ۲۰ مه) افغانستان د ملګروملتو د بشري حقونو د شورا غړیتوب ته بریالی نه شو. تر دې وړاندې افغانستان د دې شورا غړیتوب درلود.
د ملګروملتو عمومي اسمبلۍ نن (سې شنبه) د بشري حقونو په شورا کې، چې ۴۷ غړي لري، د ۱۴ هیوادونو د شاملولو لپاره رایې واخیستې.
د پنځو سیمه ییزو ډلو له لوري ۱۷ هیوادونه کاندید وو خو اصلي سیالي په دوو ګروپونو یعني د اسیا – پسفیک او لاتینې امریکا او کربین هیوادونو په منځ کې وه.
د ملګروملتو د بشري حقونو د شورا مرکز د سویس په جینیوا کې دی.
په هغه ګروپ کې چې افغانستان کاندید و، څلور چوکۍ تشې وې او د دغو څلورو چوکیو لپاره د افغانستان ترڅنګ بنګله دېش، قرغیزستان، مالدیپ، جنوبي کوریا او ویتنام کاندید وو.
په نننیو رایو اخیستنو کې افغانستان کافي رایې ترلاسه نه کړای شوې.
د ملګروملتو د بشري حقونو د شورا پر اساس الجزایر، بنګله دېش، چیلي، بلجیم، کوستاریکا، ګورجستان، قرغیزستان، جرمني، مالدیپ، مراکش، رومانیا، جنوبي افریقا، سوډان او ویتنام غوره شول.
دا په داسې حال کې ده چې د بشري حقونو په برخه کې د ویتنام سابقه خرابه بلل کېده او د بري چانس یې کم ښوول شوی و خو د دې لپاره چې په افغانستان کې په رسمیت پېژندل شوی حکومت نه شته او طالبان هم نجونو ته د زده کړو او ښځو ته د کار د حق د نه ورکولو په خاطر له انتقادونو سره مخامخ دي، د ملګروملتو د بشري حقونو شورا ته د افغانستان په استازیتوب د چا د غوره کېدو چانس کم شوی و.