تاند(سې شنبه، د میزان ۱۹ مه) افغان خبریال زرخان همدرد، چې په عرفان الله مشهور و، ترکیې ته د مهاحرت په لاره کې د دغه هیواد په وان سیمه کې مړ شوی دی.
ښاغلي همدرد پخوا په ژوندون تلویزیون کې کار کاوه.
د همدرد کورنۍ ویلي چې څلور میاشتې یې د هغه حال نه درلود خو په وروستیو کې خبر شول چې نوموړي له ایران څخه ترکیې ته حرګت کړی دی.
که څه هم تراوسه پورې د همدرد د مړینې د نېټې او څرنګوالي په اړه کره معلومات نه شته خو ویل کېږي چې په ترافیکي پېښه کې یې سا ورکړې ده.
د وان په سیمه کې په ځلونو ترک سرحدي ځواکونو پر افغان پناه غوښتونکو، چې په غیرقانوني ډول د ایران له خاورې ترکیې ته اوړي، ډزې کړي چې له کبله یې یو شمېر افغانان وژل شوي دي.
د همدرد ورو د ترکیې له حکومته غوښتي چې افغانستان ته د ده د ورور په لېږدولو کې مرسته وکړي.
خو د ترکیې ځايي مامورینو ویلي چې همدرد یې خاورو ته سپارلی دی.
۲۵ کلن زرخان همدرد د لغمان اوسېدونکی و.
دی، چې په شمشاد تلویزیون کې د سیاسي خپرونو چلوونکی و، د جمهوریت له پرزېدو وروسته د اقتصادي ستونزو له کبله مجبوره شو چې مهاجرت ته مخه کړي.
د خبریالانو د ملاتړ سازمان د همدرد پر مړینې غمرازي ښکاره کړې او د طالبانو له اسلامي مارت څخه یې غوښتي چې پر رسنیو محدودیتونه لېرې کړي او خبریالانو ته په خپل مسلک کې د کاري فرصتونو لار هواره کړي.