تاند:(چار شنبه ،د ميزان ۱۳مه) پاکستان د دغه هېواد تر کنټرول لاندې پېښور ته نیږدې د خپلو امنيتي ځواکونو پر یوه کاروان د برید او نښتې خبر ورکړی.
پاکستاني چارواکو ویلي،چې په دې پېښه کې دوه پاکستاني ځواکونه او ۷ وسله وال وژل شوي.
پاکستان په دې اړه نور جزییات نه دي ورکړي.
چارواکو دا هم ویلي،چې د پښتونخوا د وزیرستان په ټانګ سیمه کې هم پر پاکستاني ځواکونو برید شوی.
په دې اړه نور جزییات نه دي ورکړل شوي.
د پاکستان د تحريک طالبان ویاند محمد خراساني ویلي، په دې برید کې دوی څلور پاکستاني پوځيان وژلي دي.
د دغو بریدونو خبرونه په داسې حال کې ورکړل شوي،چې د پاکستان د پوځ مشر جنرال باجوه د امریکا متحده ایالاتو په مرموز سفر تللی.
يو شمير شنونکي باور لري،چې پاکستان ورته پېښې خپله د نړیوالو مرستو د ترلاسه کولو او ځان خطر کې ښودلو لپاره کوي.
د پاکستان تر کنټرول لاندې ملتپال پښتانه باور لري،چې د دوی سیمو کې پاکستاني طالبان د پاکستان پوځ له لوري رامنځته شوي، څو د دوی استخباراتي اجنډاوې مخته يوسي.