تاند(شنبه، د میزان ۲ مه) د امریکا ولسمشر جو بایډن پرون (جمعه) له افغانستان څخه له ناټو دباندې د مهم متحد نوم واخیست.
افغانستان د پخواني ولسمشر بارک اوباما له لوري په ۲۰۱۲ م کال له ناټو دباندې د امریکا مهم متحد اعلان شوی و.
بایډن خپله دا پرېکړه په یوه یادښت کې د بهرنیو چارو وزیر انتوني بلینکن ته اعلان کړې ده.
د امریکا متحدو ایالتونو افغانستان د دې لپاره له ناټو دباندې خپل تر ټولو مهم متحد اعلان کړی و چې د افغانستان ملي امنیتي ځواکونو ته په اسانه وسلې ورکړای شي.
د بایډن په لیک کې راغلي:«د هغو اختیاراتو پر اساس چې د امریکا د متحدو ایالتونو اساسي قانون ما ته راکړی دی؛ د امریکا د غیرناټو د اصلي متحد په توګه د افغانستان غړیتوب لغوه کوم.»
له افغانستانه د غیرناټو متحد د مقام له اخیستلو وروسته د امریکا د غیرناټو متحدانو شمېر ۱۷ دی.
ارجنټاین، استرالیا، بحرین، برازیل، مصر، کولمبیا، جاپان، اسراییل، مراکش، کویت، نیوزیلنډ، پاکستان، فلیپین، قطر، جنوبي کوریا، تایلنډ او تونس له ناټو بهر د امریکا مهم متحدان دي.
امریکا له افغانستان سره ۳۲۷ میلیون ډالره بشري مرسته اعلان کړه