تاند:( دوشنبه،د سنبلې اته ويشتمه) د افغانستان لپاره د روسیې د ولسمشر ځانګړي استازي ضمیر کابلوف په افغانستان کې دوی سره د امریکا متحده ایالاتو د نه همکارۍ په اړه نوي تورونه لګولي.
نوموړی وايي چې د ترویکا پلس ناستو چې پکې روسیه، چین، امریکا او پاکستان گډون درلود دا په ډاگه کړه چې امریکا همکاره نده او د خپلو هغو گټو لپاره کار کوي چې د افغانستان، روسیې او سیمې په ضرر دي.
نوموړي زیاته کړې چې اوس د ترویکا پلس پر ځای پر یوبل فارمت کار کیږي چې په هغه کې به د افغانستان په اړه واحده تگلاره ټاکل کیږي.
ترویکا پلس فارمټ په افغانستان کې د جمهوري نظام له سقوط څخه وروسته د امریکا، روسیې، چین او پاکستان په ګډون رامنځته شو،چې ويل کيږي په رامنځته کیدو کې ېې ډېره هڅه او ونډه د پاکستان وه.
شنونکي باور لري،چې پاکستان له دغه کار سره غوښتل چې پر طالبانو د خپل نفوذ په ډاډ له دغو نړیوالو قوتونو سره د افغانستان په استازيتوب تعامل وکړي او په هم مهاله توګه د ټولو نسبي ګټې تامين یا په همدې ژمنو ترې امتيازات واخلي.
د دغو شنونکو په باور، پاکستان په دې لوبه کامیاب نه شو، ځکه امریکا متحده ایالاتو د پاکستان لخوا غوښتل شوی نقش له خپله اړخه قطر ته ورکړ او نورو هېوادونو هم په مستقيم ډول د طالبانو ځينو ډلو سره تعامل وکړ.
ویل کیږي،چې پاکستان په دې سلسله کې د خپل کمرنګه رول د پیاوړتیا لپاره د طالبانو او سيمه ييزو قدرتونو او د قطر په وسيله د امریکا د هدفونو او له هغې ډلې طالبانو سره د نړیوالو د تعامل په برخه کې ستونزې رامنځته کړي دي.