تاند( جمعه، د سنبلې يوولسمه) د طالبانو واکمنۍ وياند ذبيح الله مجاهد په یوه تازه مرکه کې د بن د ۲۰۰۱ توافقنامې په اړه،چې د طالبانو له لومړي ځل نسکوریدو وروسته د افغانستان د موقت حکومت بنسټ پکې کيښودل شو، د طالبانو دریځ په ډاګه کړ.
نوموړي وويل،چې که طالبان يادې غونډې ته بلل شوي هم وای، دوی ګډون نه پکې کاوه،ځکه په وینا یې افغانستان د امریکا له لوري اشغال شوی و او دوی د اشغال تر چتر لاندې حکومت کې برخه نه اخيسته.
د طالبانو وياند په دې مرکه کې د افغانستان د اساسي قانون د جوړيدو، د دوی د سرپرست حکومت د کار مودې او نورو مسايلو په اړه وويل،چې تر اوسه په امنيتي او ذهني لحاظ لازم شرایط ورته نه دي برابر شوي.
هغه له شپږم ټولګي څخه د پورته ښځينه ټولګيو د نا معلوم برخليک په اړه وويل،چې ورباندې خواشینی دی خو د پرانيستلو په اړه ېې د طالبانو د شورا غړي لا نتيجې ته نه دي رسېدلي.
مجاهد ومنله،چې يوه برخه طالب مشران د دغو ښوونځيو پرانيستل غواړي، خو دا چې د دوی د تصميم نیونکې شورا غړي څومره، څوک او څومره کسان ېې د يادې موضوع په اړه مثبت يا منفي نظر لري، څه ونه ويل.
طالب وياند دا هم ونه ويل،چې د طالبانو دا او نورې مهمې پریکړې ډېرې په کابل که کندهار کې کیږي.
هغه په راتلونکي یوه کال کې د طالبانو د واکمنۍ د نړیوالې رسميت پېژندنې په اړه هم هیله من نه و او امریکا ېې په دې برخه کې په خنډ جوړولو تورنه کړه.
ذبیح الله مجاهد په دې مرکه کې هم د طالبانو د حکومتولۍ د موډل په اړه توضیحات ورنه کړل او ويې ويل،چې دوی د اسلامي نظام یوه بله بڼه وړاندې کوي او د شرايطو له مساعدیدو سره به یوه شورا هم رامنځته کړي.
د طالبانو ویاند په دې مرکه کې هېواد ته د بهر ته تللو افغانانو د زمینه برابرولو د هڅو خبر هم ورکړ او ويې ويل،چې دوی د مقاومت جبهې په نوم څه په عمل کې نه ګوري او د دوی مخالفان د خلکو منځ کې منفور شوي.
نوموړي بهر ته تللي کسان د ملت استازي ونه بلل او ټینګار یې وکړ،چې هغوی د وزارتونو له تمې پرته هېواد ته ستنیدای شي.
د طالبانو وياند دوی سره د ملت د ملتیا ادعا وکړه،خو په دې اړه چې مخالفان یې د ټاکنو له لارې د ملت د ارادې معلومول غواړي څه ونه ويل.
ښاغلي مجاهد ټینګار وکړ،چې دوی د خلکو اقتصادي ستونزو ته د حل لپاره په هڅو بوخت دي او زيربنايي پروژې بیرته غواړي پيل کړي.
نوموړي د دوحې تړون د نقض په اړه پر طالبانو د امریکا تورونه رد او وويل،چې امریکا له تور لیست څخه د دوی د مشرانو د نومونو په نه ایستلو او د واکمنۍ په نه رسمیت پېژندلو یې د دوحې تړون نقضوي.
ذبیح الله مجاهد په دې اړه،چې دوی د ښځو په ګډون د افغانانو حقونه نقض کړي، خپل مخالفان وژني او ټول شموله حکومت نه جوړوي او دا د دوحې تړون نقض دی وویل،چې دا تورونه ناسم دي او د دوی له واکمنيدو سره د ګډ حکومت په اړه د بین الافغاني مذاکراتو اړتیا نه ویني.