تاند( چار شنبه، د سنبلې نهمه) په کابل کې د طالبانو حاکمې ادارې نن د وږي نهمه ( له افغانستان څخه د ټولو بهرنیو سرتېرو د وتلو لومړۍ کلیزه) د پراخو مراسمو په ترڅ کې ونمانځله.
په دې ترڅ کې ټولو نه پراخ مراسم د کابل په شمال او د پروان ولايت اړوند په بګرام پوځي اډه کې ترسره شول.
ياده اډه،چې په افغانستان کې د امریکايي ځواکونو تر ټولو ستر پوځي مرکز و، په مراسمو کې ېې د طالبانو رييس الوزرا ملا محمد حسن اخند، د دوی د دفاع وزیر ملا یعقوب مجاهد او ډېرو نورو طالب چارواکو ګډون کړی و.
په دې غونډه کې د طالبانو رييس الوزرا ملا حسن اخند په افغانستان کې د نړيوالې ټولنې پر شل کلن حضور له نیوکو سره وويل،چې په افغانستان کې ېې اساسي کارونه نه دي کړي او دوی ته د پام وړ څه په میراث ترې نه دي پاتې شوي.
په ورته وخت کې د طالبانو د ویاند ذبیح الله مجاهد له لوري په خپره شوې اعلامیه کې پر نړیوالو غږ شوی، چې د افغانستان پر وړاندې معقول سیاست خپل کړي.
د طالبانو په اعلامیه کې راغلي:« نړۍ دې افغانانو ته اجازه ورکړي څو خپلواک اسلامي نظام ولري او له افغانانو سره اړیکې عادي او مثبت تعامل وکړي.»
په ورته مهال په واشنګټن کې د روسیې سفارت له افغانستان څخه د امریکايي ځواکونو د لومړۍ کلیزې په مناسبت په یوه اعلامیه کې پر امریکا غږ کړی چې باید په افغانستان کې خپله ماتې ومني.
دا په داسې حال ده،چې د طالبانو منتقدینو د دوی له لوري د بریا په نوم ېې د نننۍ ورځې په نمانځلو نیوکې شوي او ويل شوي،چې طالبان له یوه وږي، بې برخلیکه او دوی نه په تېښته ملت سره کومه بريا نمانځي؟