تاند(جمعه، د اسد ۱۵ مه) د ایران د بهرنیو چارو وزیر وايي، ایران به د خپلو اوبو د حق حتي یو څاڅکی ګاونډیو هیوادونو؛ ترکیې او افغانستان ته ونه بخښي.
حسین امیرعبدالهیان دا خبره د خپل هیواد پارلمان ته وکړه.
ده وویل، ایران او ترکیې د ارس سین په اوبو کې د دوو خواوو د ونډې پر سر د اختلاف د حل کولو لپاره ګډه کمېټه جوړه کړې ده.
ایراني چارواکو په وروستیو کې د طالبانو له حکومت سره هم د هلمند سین او د کمال خان بند د اوبو د پرېښودو په اړه خبرې کړي دي.
له بلې خوا په نیمروز کې څینې سرچینې وايي چې طالبانو یو وار بیا د کمال خان بند اوبه خلاصي کړي دي.
د سرچینو په وینا، طالبانو د کمال خان بند اوبه نهرلشکري ته خوشي کړي چې ایران ته بهیږي.
ایراني رسنیو هم نن تایید کړه چې طالبانو د کمال خان بند اوبه خوشي کړي او د ایران د سیستان او بلوچستان ایالت تر سرحدي سیمو پورې رسېدلي دي.
طالبانو تېر کال له واک ته رسېدو وروسته هم د کمال خان بند اوبه خوشي کړې وې خو ایراني چارواکو وویل چې طالبانو داسې لوري ته اوبه پرېښودې چې نه د افغانستان په درد وخوړې او نه د ایران بلکې په شګو کې ضایع شوې.