تاند( چار شنبه ، د اسد ۱۲ مه) بامیان کې ځايي سرچینو ویلي،چې په دغه ولایت کې د لومړۍ حوزې د استخباراتو آمر او یو طالب نظامي د زنا فعل په تور نیول شوي دي.
دغو سرچينو ۸ صبح ورځپاڼې ته ویلي، چې دا دوه کسان د زنا په تور په بامیان کې د استخباراتو د رییس قاري بلال له لوري نیول شوي دي.
د سرچینې په خبره، د استخباراتو د لومړۍ حوزې آمر سیدحسن او د استخباراتو غړی سیدحسین دوه هغه نیول شوي کسان دي، چې بامیان کې د استخباراتو ریاست په بندخونه کې تر څار لاندې دي.
څه باندې يوه میاشت مخکې هم په بامیان کې د پوهنې ریاست د تعلیمي څار یو غړی او د یوه روغتیايي مرکز مدیر د زنا په تور نیول شوي وو.
تر دې مخکې د طالبانو د پاسپورټ د پخواني رييس مولوي علم ګل حقاني ورور د کابل په یوه هوټل کې د شرابو څو بوتلونو او څو بد عمله نجونو سره ونيول شو، چې په ټولنیزو رسنیو کې ېې د نیول کیدو د جریان ویډیو او اعترافونه هم خپاره شول.
د دغه طالب مقام ورور ويلي وو، چې په یاد شوي هوټل کې ېې د نیشو او فحشا تر څنګ د پاسپورټونو د جوړولو کمیشن کاري هم کوله او یو پاسپورټ ېې په ۸ سوه امريکايي ډالرو جوړوه.
طالبانو تر اوسه د نوموړي د برخلیک په اړه خلکو ته وضاحت نه دی ورکړی.
خلک نیوکه کوي،چې طالبان نورو خلکو ته د یوه چرګ د پټولو په تور مخ توروي او په ښار کې ېې ګرځوي، خو خپلو جنګیاليو ته ېې فحشا، فساد او نورې نارواوې روا کړي دي.