تاند( يکشنبه ، د اسد دويمه ) د طالبانو د رياست الوزرا مطبوعاتي دفتر وايي، چې له حیرتان، آقینې او تورغونډۍ بندرونو څخه د مایع ګاز د وارداتو په برخه کې پرمختګ شوی او ژر به عملي پایلې ولري.
د دغې ادارې د اعلاميې له مخې ، د طالبانو د صنعت او سوداګرۍ وزارت، د ریاستالوزراء اقتصادي معاونیت د عالي مقام ارشد مشاوریت، د سټنډرډ ملي ادارې او د افغانستان د نفت او ګازو دولتي شرکت په ګډه ناسته کې له ترکمنستان څخه د مایع ګاز د وارداتو زياتولو په اړه له دغه هېواده د مایع ګاز د واردوونکو شرکتونو ژمنې له هر اړخیزو بحثونو وروسته تايید شوې ده.
سرچينه زياتوي:«له ترکمنستان سره د لسګونه زره ټنه مايع ګاز د شوي قرارداد پر اساس به د مایع ګاز واردوونکي شرکتونه ډېر ژر زرګونه ټنه ګاز چې اوسمهال د افغانستان بندرونو ته رارسېدلى دى؛ له حیرتان، آقینې او تورغونډۍ بندرونو څخه د هېواد بازارونو ته وارد کړي، چې د دې کچې ګاز په واردېدو سره به د افغانستان په بازارونو کې د مایع ګاز بیې د پام وړ راټيټې شي.»
د طالبانو په دې اعلاميه کې راغلي، چې ډېر ژر به لسګونه زره ټنه نور مايع ګاز هم د هېواد بندرونو ته را ورسېږي.
دا په داسې حال کې ده، چې له څه مودې راهيسې د افغانستان په بازارونو کې د مایع ګازو بيې لوړې شوي او خلکو شکایت ورڅخه کړی.