تاند(پنجشنبه، د سرطان نهمه ) په کابل کې د ملایانو لویه غونډه نن په داسې حال کې پیل شوه چې د طالبانو رییس الوزرا ملا محمد حسن اخند له ملایانو څخه د طالبانو له ادعا شوي امیرالمؤمنین سره د بیعت او د طالبانو د مخالفانو پر وړاندې د فتوا غوښتنې وکړې.
د هرات مشهور افراطي ملا مجيب الرحمن انصاري په خپله وینا کې د هغو کسانو د سر پرې کولو فتوا ورکړه ، چې د طالبانو پر وړاندې سر پورته کوي.
نوموړي وويل چې د طالبانو حکومت د دين د حافظانو په شهادت او رشادت په ډېرې سختۍ رامنځته شوی او په ډېرې سختۍ به له منځه ځي.
د نوموړي څرګندونو ته په غبرګون کې د بې واکه شوي ولسمشر محمد اشرف غني لومړي مرستيال امرالله صالح له ملا انصاري څخه پوښتنه کړې ، چې د وينې د دومره تندې الهام يې د قرآن کريم او حديثونو له کومې برخې يا کوم انساني مکتب څخه اخيستی.
صالح زياتوي چې که نن ټاکنې وشي، د مدرسې دننه به یې طالب وګټي، خو له مدرسې د باندې ، د مدرسې په کلي کې به ېې هم وبايلي.
صالح نوموړي ته د توندو الفاظو له کارولو سره پوښتنه کوي چې آيا د طالبانو د میلیونونو مخالفانو وژل ورته ممکن ښکاري؟
بې واکه شوی مرستيال ولسمشر زیاتوي ، چې د طالب په جرګه کې نه رسنۍ او نه په ژوندۍ بڼه نشرات شته.
د نوموړي په وينا، طالبان د بل هر ولس ضده رژيم په شان د خپل پوچ داخلي ساختار له افشا کیدو ډاریږي.
ښاغلی صالح ټینګار کوي چې طالبان ورکیدونکي او د خلکو تر پښو لاندې غورځيدونکي دي، ځکه خو په خبره ېې خلک بايد د دوی خلاف د مقاومت د هڅو ملګري شي.
ملا انصاري او نورو طالب پلوو د امرالله صالح پوښتنو او نیوکو ته غبرګون نه دی ښودلی.
يو شمېر ځوانانو په ټولنيزو رسنيو کې ويلي ، چې د ملا انصاري خبرې پر ځای دي، خو د جمهوري نظام يوه تېروتنه دا وه چې له نوموړي او ورته نورو خلکو يې سرونه نه دي پرې کړي.
د طالبانو یوه مطبوعاتي مبلغ او د ارګ چارواکي قاري عبدالستار سعيد بيا د ملا انصاري د خبرو ستاينه کړې او هغه ېې « اور ژبې عالم » ګڼلی دی.
6.5 ته د تل لپاره اکزایل مبارک وی . بلې د تل لپاره.
رښتینی او حقیقي اسلام د وروري ، مینې ، عدل ، تحمل ، عفوې او د یو بل له خطا او ګناه له ګذشت نه عبارت دی .
د خوارجو دین له سرې پرې کولو ، ظلم ، وحشت ، وژلو ، ترور ، ورانولو ، سوځولو ، اتهام او دروغو خپرولو نه تشکیل شویدی .