تاند( چار شنبه ، د سرطان اتمه ) د جميعت اسلامي ګوند مشر صلاح الدين رباني په یوه پیغام کې د طالبانو له لوري د ملايانو د سبانۍ غونډې له ګډونوالو څخه خپلې غوښتنې په ډاګه کړي.
نوموړي ويلي ، چې یاده غونډه طالبانو په سمبوليکه ، فرمايشي او د وار د مخه اجنډا سره بللې، څو دوی سره په زوره له ملایانو بیعت واخلي او خپلې نا مشروع واکمنۍ ته مشروعيت پیدا کړي.
صلاح الدين رباني د غونډې له ګډونوالو ملایانو غوښتي ، چې د شریعت له مخې د شورا بنیادي اصول ، په دې برخه کې د عدالت او د غونډې د ګډونوالو شرعي مسؤلیت په پام کې ونيسي او په صراحت سره خپل دریځ په ډاګه کړي.
د جميعت ګوند مشر ټینګار کوي ، چې د افغانستان د قضیې د حل لپاره خلک بايد په خپل برخليک ټاکلو کې مستقیم او شفاف رول لرلو ته پربیښول شي ، ټاکنې وشي او د ده په خبره د سبانۍ غونډې په شان پر غولونکو غونډو نه باید ځان یا نړۍ تېر ويستل شي.
د طالبانو له لوري د ملايانو لویه غونډه سبا په داسې حال کې جوړیږي ، چې تر دې مخکې هم ځینو ډلو لکه: د احمد مسعود په مشرۍ د مقاومت ډلې، د کریم خلیلي په مشرۍ حزب وحدت او ګڼو افغان شخصیتونو او فعالانو مخالفت ورسره کړی.
طالبانو ویلي ، چې دا غونډه يې د علماوو په غوښتنه را غوښتې ، چې د هېواد له ټولو سیمو پکې علماء او قومي مشرانو برخه اخيستې ده.
د طالبانو د رییس الوزرا په لاسليک یو خپور شوی مکتوب څرګندوي ، چې د دغې غونډې د جوړېدو د چارو مشري د طالبانو د رییس الوزرا اقتصادي مرستيال ملا برادر کوي.
ملا برادر نن د لوېې جرګې په خېمه کې د دغې غونډې له سیمې لیدنه هم کړې ده.
ويل کيږي ، چې د طالبانو ادعا شوی لوی مشر ملا هیبت الله اخوند زاده ( چې د مرګ و ژوند په اړه ېې ډېرې ضد و نقیضې ادعاوې کیږي) په دې غونډه کې برخه اخلي.
طالبانو د دغې غونډې اجنډا نه ده روښانه کړې ، خو منتقدین ېې وايي چې په غونډه کې به د طالبانو ملایان د دوی له « امیرالمؤمنین » سره د نورو افغانانو په « استازیتوب » «بیعت » وکړي.
ګومان کېږي ، چې تر درې زرو پورې ملایان به یاده غونډه کې برخه واخلي.
د افغانستان د مختلفو نورو قشرونو خلکو په دغه غونډه نیوکې کړي ، چې انحصاري ده او طالبان ورسره عملآ څرګندوي ، چې د نورو قشرونو د انحلال په تکل کې دي.