تاند(پنجشنبه، د سرطان ۲ مه) د کډوالو په چارو کې د ملګروملتو لویه کمیشنري خبرداری ورکوي چې که د پکتیکا – خوست د زلزلې د ټپیانو درملنه ژر ونه شي، نور کسان به هم له ژونده بې برخې شي.
په پکتیکا او خوست کې تر کنډوالو لاندې د بندو پاتې شویو کسانو د موندلو او ژغورلو هڅې لا هم دوام لري.
په دواړو ولایتونو کې لږترلږه ۱۵۰۰ تنه مړه شوي او تر ۲۰۰۰ ډېر نور ژوبل دي.
د ملګروملتو د کډوالو لوی کمیشنر د افغانستان د جنوب ختیځو ولایتونو زلزله یو ناورین وباله، ویې ویل:«د ملګروملتو د کډوالو لویه کمیشنري په دې سخت وخت کې د افغانانو ترڅنګ درېږي او زلزله ځپلیو ته د مرستو رسولو لپاره له خپلو ټولو امکاناتو کار اخلي.»
ښاغلي ګراندې زیاته کړه:«دې ناورین یو وار بیا څرګنده کړه چې افغانان د نړیوالې ټولنې مرستې ته اړتیا لري او د نړیوال پیوستون مستحق دي.»
د ملګروملتو د کډوالو لویه کمیشنري وايي، خپل یو شمېر کارکوونکي یې زلزله ځپلیو سیمو ته د مرستې لپاره استولي دي.
نن (پنجشنبې) کرۍ ورځ خلک د زلزله ځپلیو سیمو په کلیو کې په لاس او بېل کنډوالې کیندلې چې مړي له خاورو راوباسي.
ملګري ملتونه وايي، په افغانستان کې د پلټنې او ژغورنې توان نه لري نو ترکیه غوره انتخاب ګڼی چې د افغانستان د چهارشنبې د ورځې له مرګونو زلزلې وروسته هلته د ژغورنې او پلټنې عملیات وکړي.
د جنوبي کوریا د بهرنیو چارو وزارت نن (پنجشنبې) اعلان وکړ چې په افغ انستان کې د زلزلې قربانیانو ته یو میلیون ډالره بشري مرسته ورکوي.
په افغانستان کې د روغتیا نړیوال سازمان پرون وویل چې لس ټنه طبي مرسته د افغانستان زلزله ځپلیو سیمو ته استوي.
د طالبانو ویندوی ذبیح الله مجاهد نن وویل چې ایران دوه الوتکې بشري مرسته ورلېږلې او قطر یوه الوتکه په بشري مرسته ورلېږلې ده.
د ده په وینا پاکستان د خوراکي او نورو اړتیا وړ شیانو اته لارۍ پکتیکا ولایت ته استولي دي.
له بلې خوا جاپان، د امریکا متحدو ایالتونو، جرمني او ترکیې هم ویلي چې افغان زلزله ځپلیو ته بشري مرستې لېږي.
د طالبانو مشر ملاعبت الله اخوندزاده په یوه پیغام کې له نړیوالې ټولنې او ملګروملتو غوښتي چې له افغانانو سره بشري مرسته وکړي.
د افغانستان لپاره د ملګروملتو د بشري مرستو همغږوونکي رامز الاکبروف پرون وویل، باور لري چې نژدې ۲ زره کورونه نړېدلي دي.
ده له کابل څخه د ویدیو کنفرانس له لارې په نیویارک کې خبریالانو ته وویل، د هغو کسانو چې تراوسه یې مړ – ژوندی معلوم نه دی، ښايي خورا ډېر وي.
الاکبراوف وايي، د افغان کورنیو د غړیو شمېر په متوسط ډول ۸ کسه دی، او ځینې وخت څو کورنۍ په یوه کور کې اوسي.