تاند( پنج شنبه ، د سرطان دويمه) د حقاني شبکې مشر او د طالبانو د کورنیو چارو وزیر خلیفه سراج الدین حقاني د مجمع الفقه الاسلامیة نړيوالې ټولنې له مشر او استازو سره وکتل.
د طالبانو د کورنیو چارو وزارت د خبرپاڼې له مخې ،په دې کتنه کې مولوي حقاني وویل، چې علماء پر اسلامي امت باندې د الله تعالی رحمت دی او د عالمانو وحدت، همغږي او هدایات د امت دنیوي او اخروي ستونزې له منځه وړي.
سراج الدين حقاني وویل چې د الله تعالی ستر نعمت امن دی او امن د ټولو پرمختګونو اساس دی چې الحمدلله دا مهال افغانستان ترې برخمن دی.
نوموړي زياته کړه:« هغه مشکلات به د علماءکرامو د مجلسونو او توصیو په برکت حل شي چې دا مهال افغانستان ورسره مخ دی.»
سرچینه زیاتوي ، د یادې ټولنې استازو په پکتیکا ولایت کې د زلزلې د قربانیانو تعزیت وړاندې کړ او د طالبانو نظام د استحکام لپاره یې له سراج الدين حقاني سره خپلې مشورې شریکې کړې.
هغوی ژمنه وکړه چې خپلو مشرانو او هیوادونو ته به د طالبانو واقعي تصوير وړاندې کوي او د افغانستان د پرمختګ لپاره به خپلي همکارۍ نه سپموي.
د طالبانو د کورنیو چارو وزیر يادې څرګندونې په داسې حال کې کړي ، چې خلک د افغانستان د اداري نظام د شړیدو، د فقر او ناورین د اوج او هېواد نه د میلیونونو کسانو د وتو یو اصلي دليل د ملايانو او طالبانو لخوا د ټولو چارو انحصار او پر مسلکي کادرونو د کړۍ تنګول ګڼي.