تاند(چار شنبه، د جوزا ۱۸ مه) د طالبانو چارواکو ویلي، چې تر راتلونکو شپږو مياشتو پورې به د ټاپي سیمه ییزې پروژې عملي چارې پيل شي.
د طالبانو تر کنټرول لاندې باختر خبري اژانس وايي، چې په دې اړه نن په هرات کې د طالبانو والي شیخالدیث نوراحمد اسلامجار، په افغانستان کې د ترکمنستان سفیر خواجه عوضوف او د ټاپي پروژې اجراييوي رييس محمد مراد امانوف خبرې سره کړي دي.
سرچينه زياتوي، چې د ټاپي پروژې د عملي چارې د پیل نېټه د يادې پروژې اجراييوي رييس کړې ده.
ټاپي د افغانستان له لارې د دغه هېواد په ګډون پاکستان او هندوستان ته د ترکمنستان د ګازو نل ليکې د لېږد پروژه ده، چې چارې ېې پخوا پلان شوې وې، خو عملا د پخواني ولسمشر اشرف غني د ولسمشرۍ پر مهال پیل شوې وې.
اقتصادي شنونکي بيا په دې اړه ډېر خوشبینه نه ښکاري، ځکه په وینا تر هغې چې د طالبانو حکومت ملي او نړيوال مشروعيت پیدا نه کړي، هېوادونه او نړيوال سازمانونه ورسره په ډاډه زړه تعامل نه شي کولای.
شنونکي پر دې هم ټينګار کوي، چې د مسلکي کادرونو په نه موجوديت کې به د ملايانو د حکومت ګډون او مخته تلل په داسې مهمو پروژو کې افغانستان ته ډېر ګټور نه وي.
طالبان بيا داسې ادعاوې ردوي او د ښو اقتصادي پروګرامونو د لرلو خبره کوي.