تاند(چار شنبه، د جوزا ۱۸ مه) د افغانستان لپاره د ملگرو ملتونو د خاصې استازې میرمن دیبورا لیونز دنده پای ته ورسېده.
پخواني ولسمشر حامد کرزي په خپله ټويټر پاڼه کې ليکلي، چې په دې مناسبت یې نوموړې ته د مخه ښې مېلمستيا برابره کړې وه.
سرچينه زياتوي:« په دغې تودیعي میلمستیا کې چې په کابل کې د ترکیې سفیر
جهاد ارگینای هم حضور درلود، د دې ترڅنگ چې د افغانستان پر روانو حالاتو خبرې وشوې، د نجونو پر زدهکړو او کار ته د ښځو پر ستنېدو په کلکه ټینگار وشو.»
پخواني ولسمشر د ملگرو_ملتونو د همکاریو، په خاصه ټوگه د میرمن دیبورا لیونز له هلو ځلو او هڅو ستاینه وکړه او د افغانستان له خلکو سره یې د ملگرو ملتونو د همکاریو پر دوام ټینگار وکړ.
د يادونې وړ ده، چې په افغانستان کې د ملګرو ملتونو د خاص استازيتوب څوکۍ ته هر دوه کاله نوی کس ګومارل کېږي.
د مېرمن لاينز د ځای ناستي د ټاکل کیدو په اړه تر اوسه څه نه دي ويل شوي.