تاند(یکشنبه، د جوزا ۱۵ مه) په هرات کې د طالبانو ځايي چارواکو ويلي، چې د پاسپورټ ادارې دوه کارکوونکي يې د کمیشن کارۍ، د اسنادو د جعل او غیر اصولي کار په تور له دندو ګوښه او نیولي دي.
چارواکو د نیول شویو کسانو په اړه نور جزییات نه دي ورکړي.
معلومه نه ده، چې دغه کسان د جمهوري نظام د وخت کارکوونکي او که طالبان وو؟
پر طالبانو تور دی، چې د جمهوري نظام پاتې کارکوونکي تر ډېره په مختلفو پلمو له دندو ګوښه او پر ځای ېې خپل جنګیالي ګوماري.
د هرات د طالب چارواکو په وينا، په دې ولايت کې د پاسپورټ مديريت له پيل څخه تر اوسه د کمیشن کاری او د اسناد جعلکارۍ په تور ۲۲ تنه نيولي او عدلي او قضايي ارګانونو ته معرفي کری دي.
د طالبانو له واکمنيدو او له هېواده وتو ته د ميليونونو کسانو په مجبوریدو سره د پاسپورت ترلاسه کول خورا سخت شوي او په تور بازار کې د یوه پاسپورټ بیه له زر ډالرو هم اوښتی ده.
څو میاشتې مخکې د طالبانو د پاسپورټ د رییس مولوي عالم ګل حقاني ورور د کابل په یوه هوټل کې په داسې مهال له څو نڅیدونکو نجونو سره په نیشه حالت کې ونیول شو، چې د پاسپورټونو په کمیشن کارۍ بوخت و.
طالبانو د دې پېښې په غبرګون کې عالم ګل حقاني له دندې ګوښه کړ، خو د ورور د مجازات او برخليک په اړه یې تر اوسه څه نه دي ویل شوي.