تاند(یکشنبه، د جوزا ۱۵ مه) پاکستاني رسنۍ ادعا کوي چې د افغان ط بانو په هڅو او منځګړتوب پاکستاني طالبان حاضر شوي چې د پاکستان له حکومت سره درې میاشتنی اوربند وکړي.
دا پرېکړه وروسته له دې وشوه چې د پخوانیو پاکستاني چارواکو په ګډون د قبایلي سیمو او خیبر پښتونخوا یوه جرګه کابل ته راغله او له پاکستاني طالبانو سره یې د اماراتي چارواکو په منځګړتوب خبرې وکړې.
د پاکستان د نیوز انترنشنل ورځپاڼې د راپور له مخې، دا موافقه د جمعې په ورځ په کابل کې د پاکستاني طالبانو یا ټي ټي پي او د ۵۳ کسیزې جرګې د غړیو ترمنځ د خبرو په لومړي پړاو کې وشوه.
دا موافقه له دې سره سره شوې چې د ټي ټي پي ګڼ شمېر غړي له افغان طالبانو ګیله من دي چې دوی د افغانستان د حکومت خلاف له دې سره سره جګړې ته دوام ورکاوه چې ټول بهرني پوځیان وتل او د افغانستان قوانین اسلامي وو، خو پاکستاني طالبان اړ باسي چې د پاکستان انګریزي قوانین ومني.
دي نیوز ورځپاڼه د جرګې د یوه غړي پر اساس ادعا کوي چې دواړو خواوو پر درې میاشتني اوربند او د سولې د پروسې پر دوام سلا کړې ده.
ورځپاڼه په عین حال کې وايي چې د پاکستاني طالبانو تحریک پر خپلو ځینو غوښتنو ټینګار کوي لکه دا چې قبایلي سیمې دې له خیبر پښتونخوا څخه بېرته بېلې شي.
خو د پاکستاني طالبانو اصلي غوښتنه په پاکستان کې د شریعت نفاذ دی. پاکستاني رسنۍ هڅه کوي چې دا غوښتنه کمرنګه وښيي.
د ټي ټي پي غړیو تل په دې ټینګار کړی چې د انګریزي قوانینو پر ځای دې اسلامي قوانین نافد شي او پوځ دې له قبایلي سیمو ووځي.
له بلې خوا د نیوز ورځپاڼې پر اساس، د پاکستان حکومت له ټي ټي پي څخه غواړي چې خپل تحریک منحل کړي، د پاکستان اساسي قانون ومني او بې وسلو پاکستان ته وګرځي.