تاند(چار شنبه، د جوزا ۱۱ مه) په کابل کې یو شمېر با خبره سرچينو تاند ته ویلي، چې د جمهوري نظام د مصالحې د عالي شورا رييس او د دغه پرزول شوي نظام د نیمايي ونډې مالک ډاکټر عبدالله عبدالله په هندوستان کې د طالبانو او ياد شوي هېواد د اړیکو د رغولو لپاره په لابۍ بوخت دی او تمه کيږي، چې ژر له هدف ته رسېدو وروسته کابل ته را ستون شي.
سرچينه زياتوي، چې ډاکټر عبدالله تر ډېره د حامد کرزي په وسیله د طالبانو د لوی کندهار ډلې سره نيږدې اړيکې لري او هندي چارواکو ته یې د همدې ډلې د حسن نیت پیغامونه لېږدولي.
سرچينه زياتوي، چې د طالبانو د لوی پکتیا ډلې( حقاني شبکې) یوه مشر انس حقاني تېره اونۍ د لوی کندهار ډلې سره د خپلمنځي رقابت له مخې لاس په کار او يوې هندي رسنۍ سره د مرکې پر مهال د هندوستان په اړه د خپلې شبکې حسن نیت څرګند کړ.
د سرچينې د معلوماتو له مخې، د هندوستان په ګډون له ګڼو هېوادونو سره د طالبانو د اړيکو له ښه کولو سره د پخواني ولسمشر حامد کرزي هڅې هم روانې دي.
ويل شوي، چې کرزی او عبدالله د طالبانو د بهرنيو اړيکو د نه ښه کیدو په صورت کې د دوی د واکمنۍ د شړیدو او بل خطرناک ناورین ته د افغانستان د لوېدو اندیښنه لري.
ښاغلي کرزي په یوه مرکه کې ویلي وو، چې طالبان د ده په غوښتنه کابل ته ننوتي او په زوره ېې دا پلازمېنه نه ده نیولې.
د ډاکټر عبدالله یوې نیږدې سرچېنې د طالبانو په استازيتوب له هندوستان سره مذاکرات رد یا تایید نه کړل، خو کابل یې په نیږدې راتلونکي کې د نوموړي د بیرته ستنیدو پخلی وکړ.
له څه مودې راهيسې په کابل کې د هندوستان د سفارت د بیرته پرانیستل کیدو په اړه راپورونه زیات شوي.
د طالبانو د بهرنيو چارو وزير مولوي امیرخان متقي په يوه مرکه کې پرون هندوستان ته ډاډ ورکړ، چې د سفارت او کونسلګريو امنيت به یې په ښه توګه وساتي.