تاند(یکشنبه، د جوزا ۸ مه) له څه مودې ځنډ وروسته په کابل کې نن بیا يو شمېر ښځينه معترضانې د طالبانو د قیوداتو او خپلو ستونزو په اړه کابل کې لاریون کاوه، خو د طالبانو ځواکونو يې مخنیوی کړی دی.
دغو معترضانو ویلي، چې د ورځ تر بلې زیاتیدونکي فقر او بې کارۍ پر وړاندې يې د کابل ښار په شهرنو او په دویم قدم کې د ګلبهار سنټر مخې ته د لاریون تابیا لرله، خو طالبانود لاریون له مخنيوي څخه وروسته هغوی تعقيب کړي هم دي.
لاریون کوونکو له دې سره بيا هم د « ډوډۍ» « کار» « ازادۍ» او « زده کړې زموږ حق دی» شعارونه ورکړي دي.
د معترضینو له ډلې یوې نجلۍ خبریالانو ته وویل، چې دوی مساوي حقونو ته تر رسېدو پورې خپلو اعتراضونو ته دوام ورکوي.
د طالبانو د بيا واکمنیدو څخه وروسته، په افغانستان کې میلیونونه نجونو او ښځو ته د زده کړو، فعالیتونو او دندو اجازه نه ده ورکړل شوې.
له دې کبله طالبان په کور دننه او نړيواله کچه سختو نيوکو سره مخامخ شوي دي.