تاند(سې شنبه، د جوزا ۳) د طالبانو د کورنيو چارو د وزير مولوي سراج الدين حقاني سر ياور مولوي عبدالرحیم ثاقب د اروپا د سولې انستیتوت له استازي ماریان زومبیلیو سره ليدلي.
د طالبانو په يوه اعلاميه کې راغلي، چې په دې ليدنه کې د امنيتي مسايلو په اړه بحثونه او خبرې شوي.
مولوي ثاقب د دغې ليدنې پر مهال د هېواد امنيتي وضعيت ښه بللی او د داعش او نورو ډلو موجوديت يې فيسبوکي تبلیغات بللي دي.
د اروپايي ټولنې د سولې انستیتوت استازي بيا د سولې لپاره پر اجماع ټینګیدو ټینګار کړی او ویلي، چې دوی د سولې په برخه کې طالبانو ته مشورې ورکولای شي.
د طالبانو د کورنيو چارو د وزير يادې څرګندونې په داسې حال کې کړي چې داعش ډلې د کابل د نړيوال هوايي ډګر پر سړک د طالبانو د پخواني رهبر ملا اختر محمد منصور د وژل کيدو د شپږمې تلین غونډې د مراسمو د پای ته رسیدو پر وخت د شوي ځانمرګي برید مسئولیت پر غاړه اخيستی او د بريدګر اسناد يې خپاره کړي.