تاند(چار شنبه، د ثور ۲۸ مه) په افغانستان کې د طالبانو د واکمنۍ وياند ذبيح الله مجاهد په کابل کې د پاکستان د حکومت او د پاکستان د طالبانو د تحریک تر منځ د افغان طالبانو په منځګړیتوب په کابل کې د مذاکراتو د ترسره کيدو او اوربند خبر ورکړ.
نوموړي په يو لړ ټويټونو کې ویلي، چې د مذاکراتو په جریان کې په اړوندو موضوعاتو کې د پام وړ پرمختګ ترڅنګ په لنډمهاله اوربند هم توافق وشو.
مجاهد زیاتوي، چې دوی د خیر غوښتني په نیت کوښښ کوي چې د مذاکراتو سلسله په بریالي شکل پرمخ ولاړه شي او له دواړو طرفونو څخه دیوبل د زغملو او انعطاف هیله کوي.
د طالبانو ویاند نه دي ويلي، چې ياد شوي مذاکرات د طالبانو له اړخه کومې ډلې تنظيم کړي وو.
پرون رسنيو خبر ورکړ، چې د پاکستان د یوه قول اردو قومندان او د استخباراتي ادارې پخواني رييس جنرال فیض حميد له پاکستاني طالبانو سره د مذاکراتو په هدف کابل ته تللی.
مخکې د یو لړ نورو داسې مذاکراتو کوربه توب د حقاني شبکې مشر او د طالبانو د کورنيو چارو وزير مولوي سراج الدين حقاني په خوست ولايت کې کړی و.