تاند:( چارشنبه، د ثور اوومه) د افغانستان لپاره د ایران د ولسمشر ځانګړي استازي کاظمي قمي د طالبانو له لوري د لوېې جرګې د بللو او افغان سیاسي لوریو سره د اړیکو خبر ورکړی.
نوموړي د دغه هېواد مهر خبري آژانس ته وويل، چې طالبان غواړي سیاسي مشران د خبرو لپاره کابل ته ور وګرځي.
نوموړي هیله مندي ښودلې، چې دغه ه
پلان عملي شي او ښې پایلې ولري.
د ایران د ولسمشر استازي دغه راز وويل، چې د دې پلان له عملي کیدو او افغانستان ته له ګټور ثابتیدو سره به یې له ایران څخه ډېر افغان کډوال بیرته خپل هېواد ته ستانه شي.
د ایران د ولسمشر استازي ټينګار وکړ، چې يو ټول ګډونه حکومت د افغانستان له ثبات سره مرسته کوي او ایران د همداسې حکومت جوړیدل غواړي.
هغه د لوېې جرګې د جوړولو د پلان او افغان سیاسي مشرانو سره د طالبانو د تماسونو په اړه نور جزییات نه دي ورکړي.
طالبانو هم په دې اړه څه نه دي ويلي.
ځینې سرچینې بیا له نورو جزيياتو پرته وايي، چې د لوېې جرګې یا په بل نوم د همداسې یوه اجماع د جوړولو په اړه به د کوچني اختر د لمانځه پر مهال د طالبانو د لوی مشر ملا هیبت الله اخوند زاده په نوم را څرګندیدونکی کس( چې رسنیز شویو عکسونو سره به یې فرق ولري) په دې اړه د طالبانو دریځ اعلان کړي.