تاند(پنجشنبه، د ثور ۱) د وحدت ګوند مشر محمد محقق وايي چې د مزارشریف ښار د شیعه ګانو په «سې دوکان» جومات کې د نن ورځې په چاودنه کې د وژل شویو کسانو شمېر ۶۱ تنو ته زیات شوی دی.
محقق تور پورې کړی چې له ۴۰ څخه ۶۱ تنو ته د وژل شویو کسانو شمېر په دې خاطر زیات شوی چې طالبانو د ټپیانو خپلوان نه دي پرې ایښي چې خپلو عزیزانو ته وینې ورکړي.
د طالبانو دغه مخالف مشر، چې د هزاره قوم په منځ کې یې اوس ګرانښت ډېر کم شوی دی، همداراز ادعا کړې چې طالبانو له ټپیانو سره بد چلند کړی دی.
محقق همداراز له خلکو غوښتي چې د جومات پر ځای په کورونو کې لمونځونه وکړي او غونډو ته لاړ نه شي.
خو په بلخ ولایت کې د طالبانو د حکومت د اطلاعاتو او فرهنګ ريیس ذبیح الله روحاني وايي چې په مزارشریف ښار کې د شیعه افغانانو په جومات کې د وژل شویو کسانو شمېر ۲۵ تنو ته رسېدلی دی.
په مزارشریف ښار کې د ابوعلي سینا روغتون ريیس ډاکتر غوث الدین انوري وايي چې د پېښې له ځایه روغتون ته ۱۰ مړي او ۳۲ ټپیان وروړل شوي دي.
نن ماښام مهال هم له مزارشریف ښاره د ډزو راپورونه ورکړل شول. د دغو ډزو په اړه ضد و نقیض راپورونه ورکول کېږي. خو وروستي راپورونه وايي چې طالبانو وضعیت کنټرول کړی دی.
له دې جلا له کندوز څخه تاند ته رارسېدلي راپورونه وايي چې د ښار په جنوب کې د دورې پر سر په چاودنه کې ۴ تنه وژل شوي او ۱۹ ژوبل دي.
د کندوز د امنیه قوماندانۍ ویندوی حافظ عبیدالله عابدي ویلي چې چاودنه د غرمې په دوولس بجې د ۲۱۷ عمري قول اردو د مستریانو پر کاسټر موټر وشوه چې له کبله یې د قول اردو د تخنیکي ورکشاپ ۴ کارکوونکي ووژل شول او ۱۹ نور ژوبل شول.
په ټپیانو کې ۳ لاروي ماشومان هم شامل دي.
عابدي وايي چې بم په یوه بایسکل پورې نښلول شوی و.
له بلې خوا د ننګرهار د خوږیاڼو ولسوالۍ په « بر خوارانو» کلي کې نن د طالبانو پر رنجر موټر د سړک غاړې ماین چاودنې څلور طالب سرتیري وژلي او یو بل یې ټپي کړی دی.
د خوږیاڼو ولسوالۍ لپاره د طالبانو ولسوال قاري صلاح الدین وویل، چې دغه چاودنه نن سهار په «بره خوارانو» سیمه کې د سړک غاړې ځای پر ځای شوي ماین د امنیتي ځواکونو په یو رینجر موټر چاودنه کړې.
د کابل او ننګرهار د نننیو چاودنو مسوولیت کومې ډلې په غاړه نه دی اخیستی.